आम्ही सगळे सोडायला गेलो ती तिथे एकटीच होती !!!

आम्ही सगळे सोडायला गेलो ती तिथे एकटीच होती
आम्ही आमची कामे वाटून घेतली होती
कुणी पासाचे काम पाहायला गेलं .
कुणी लाकडे नीट आहेत ना हे पहायला
 ती तरी सुद्धा एकटीच होती ...

आमच्या गोतावळ्यात एकच कोलाहल झाला
आमचा मित्र इतका वेळ सावरलेला
अचानकच उन्मळला आणि कोलमडून गेला
आम्ही सगळे धीर द्यायला धावलो
तरी ती तिथे एकटीच होती ...

आम्ही त्याला बरेच सावरले
तोही लहान मुलासारखा आमचे अता ऐकू लागला
पुढचे विधी चालू झाले , शेवटचे दर्शन हरेक घेऊ लागला
रांग जसजशी कमी झाली शेवटचा प्रवास सुरु झाला
तरी ती तिथे एकटीच होती ...

काही वेळानी परत उद्या सकाळी कुणी यायचे
यावर विचार होऊ लागला
उद्याचा दिवस खराब, अस्थी विसर्जन परवा करावे
असा एकदाचा निकाल लागला
तरी ती तिथे एकटीच होती ...

आम्ही सगळे परतायला एकत्रच निघालो
ऐन पहाट होत होती
आता मात्र त्या दोघी तिथे सोबत होत्या
एकमेकींना साथ शेवटची देत होत्या

प्र...साद
०५.०५.२०११